Tug Cai Tswjfwm (Règlement Intérieur)

Télécharger le fichier en PDF

   Pawg III : Has txug kev saablaaj

III – 1) SAABLAAJ ROOJ TSAAVXWM :

A)    Cov Tsaavxwm huv HKMF muaj saablaaj 1 xyoos 3 zag :

Lub 2 hlis, lub 6 hli hab lub 10 hli. Tabsis yog muaj dlejnum ceev, hu saablaaj tshwjxeeb los tau.

B)  Kev hu saab-laaj (convocation) :

Yuav tsum hu rooj saab-laaj lug ntawm kev xaa ntaubntawv nrug cov txheejtxheem kev yuav sisthaam uantej 2 lub limtam.

C)  Thaus muaj dlejnum maaj kws yuav tau muab kev txavtxim sab sai ces muaj feem siv tau kev sisthaam kws yog muab suab pumzoo nrug kev siv xuvtooj cua : tél, fax los internet.

Tej kev pumzoo le nuav yuav tau muab sau (rapport) khaws ca hab yuav tau coj moog qha rua rooj saablaaj lwmzag paub txug.

III – 2) ROOJ SAABLAAJ LUJ (Assemblée Générale) :

A)  Rooj saablaaj txwmxyoo (AGO) :

HKMF muaj saablaaj luj 1 xyoos 1 zag kws hu ua rooj saablaaj txwm xyoo. Lub rooj saablaaj nuav muaj rua lub 3 hlis.

B)  Rooj saablaaj tshwjxeeb (AGE) :

Thaus has txug cov dlejnum nraag nuav, yuav tau hu muaj rooj saablaaj tshwjxeeb :

         - Khu, ntxiv hab rhu tug cai tsimtsaa, tug cai tswjfwm, cov cai ntxiv

         - Tso HKMF tseg.

- Thaus cov pawgntseeg kws yog tswvcuab ntawm HKMF muaj txug

   2 feem 3 ntawm cov pawgnseeg tau ua ntawv kus memteg zeeg tuaj

   rua lub rooj tsaavxwm.

            C)  Rooj saablaaj lub fwjchim (Pouvoir de l’AG)

1) Cov muaj feem koom saablaaj :

Txhua pawgntseeg ntawm HKMF muaj feem koom muab kev tuavxaam, kev tawm suab hab kev pumzoo nyob rua huv HKMF lub rooj saab-laaj luj, lug ntawm puab cov sawvcev le nraag nuav :

a)      Cov sawvcev pawgntseeg muab tso le nuav :

1)  Cov sawvcev tej pawgntseeg ntawm HKMF muab faib le nraag nuav :

-  3 leeg rua cov pawgntseeg kws muaj tswvcuab 15 yim rovhuv.

-  4 leeg rua cov pawgntseeg kws muaj tswvcuab txij 16 yim rov sau.

2) Cov tswvcuab kws muab xaam rua kev xaam cov sawvcev nuav yog cov kws tub muaj npe cobzeem ua tswvcuab rua tej pawgntseeg lawv numtswv kevcai  lawm xwb.

b)     Yog cov pawgntseeg ntawm HKMF ua cov xaiv puab cov sawvcev. Pawgntseeg kws tsi muaj xwbfwb, ces tug thawj txwjlaug ntawm pawgntseeg yuav tsum yog ib tug ntawm cov sawvcev ntaag. Yog nwg tsi khoom lossis muaj dlejnum taabkaum, lwmtug tuaj hloov nwg chaw los tau.

c)      Cov sawvcev yuav tsum yog tswvcuab lawvle numtswv kevcai ntawm pawgntseg ntawd, quaspuj quasyawg, tub ntxhais hluas los tau tabsis yuav tsum muaj noobnyoog 18 xyoo rov sau.

d)     Dlhau ntawm cov sawvcev ntawm cov pawgntseeg lawm, cov xwbfwb hab cov tsaavxwm ntawm HKMF muaj feem koom rooj saablaaj hab muaj cai tawmsuab le ib tug sawvcev tabsis puab tsi yog cov sawvcev ntawm cov pawgntseeg.

2)        Feem txais tau kev tsocai :

Ib tug sawvcev ntawm ib pawgntseeg muaj cai txais tau ntawv tsocai ntawm nwg pawg ntseeg (bon de pouvoir) ib lub suab. 

Kev tso cai kws yuav siv tau, yuav tsum yog xaa los muab dlaim ntawv tsocai kws muaj kus memteg rua tug teev ntawv ua ntej lub rooj saablaaj.

3)        Feem saablaaj tau (Quorum) :

Rooj saablaaj yuav sisthaam tau yuav tsum yog cov pawgntseeg tuaj coob txug 2 feem 3 le tau teev ca rua ntawm tug cai tsimtsaa (statuts) nqai 5.

4)        Tug txhooj siv rua kev xaiv lossis kev pumzoo :

Kev tawmsuab rua tej kev txavtxim sab kws yuav siv tau, yuav yog tau txais kev pumzoo feemcoob ntawm cov tuaj koom hab cov sawvcev rua rooj saablaaj nub ntawd ; tshwj tas tug txhooj (%) nuav tau muaj sau meej ca rua huv tej cai tsimtsaa los cov cai ntxiv.

5)   Kev hu saablaaj :

a) Hu saab-laaj lug ntawm kev xaa ntaubntawv nrug cov txheejtxheem kev yuav sisthaam hab cov ntawv tso cai sawvcev.

b) Hu los caw saab-laaj 3 lub limtam yaamtsawg uantej nub saab-laaj.

III – 3)  CAI TSWJ ROOJ SAABLAAJ :

            Vim muaj dlejnum ntau yaam yuavtsum thaam hab yuav txhimkhu thaus saablaaj txwmxyoo hab xaav kuas tej dlejnum tav sai, moog tau zoo, HKMF yuav siv cov cai nraagqaab nuav lug tswj rooj saablaaj lawvle ua tau.

Txhua tug kws koom lub rooj saablaaj yuav tau coj hab ua lawv le nraag nuav :

1) Yuav tsum fwm tug thawj tswj rooj saablaaj.

2) Tug yuav has lug, nwg yuav tsum tsaa teg tog thawj tswj rooj tso cai, hab qha nwg lub npe maam has tau.

3) Tsi pub ib tug lug has dlhau 3 zag txug tuab lub ntsablug.

4) Tsi pub has txawv los tawm txheej txheem (hors sujet).

5) Yog lwm tug tub has le yug kev xaav los thooj le yug lub tswvyim lawm ces tsi xob has tshooj ntxiv.

6) Tsi pub muaj kev sis tuavxaam rua ib caag ntawm rooj saablaaj los sis ntxhi rua ib qho.

7) Thaus feemcoob tub pumzoo lawvle tej cai lijchoj tau teev ca  lawm ces tsi pub muaj has moog has lug ntxiv lawm.

8) Tsi pub muaj kev npau tawg, siv lub suab siscaav, taw teg nki los muaj tug cwjpwm tsi tsimnyog.

9) Yuav tsum nyob koom saablaaj kuas xaus.

   Pawg IV : Has txug rooj tsaavxwm, lwmpaab kaavxwm hab cov tshuajnyaj

IV – 1) ROOJ TSAAVXWM :

A)  Peevxwm ntawm lub rooj tsaavxwm :

1)        dlha tej dlejnum hab homphaj kws rooj saab-laaj luj tau sisthaam

pumzoo.

2)        nrhav hauvkev lug txhimkhu kuas HKMF teg dlejnum nthuav

dlaav moog tau dleb.

3)        ceev hab tswj tej nyajtxag, cuabyeej toomtxeem, vaajtse kws yog

HKMF teejtug hab ua tej ntaubntawv kuas zoo khawsca.

4)        npaaj txheejtxheem hab dlejnum yuav npaaj ua rua rooj saab-laaj

txwmxyoo.

5)        sawv cev HKMF rua tom numtswv hab rua lwm paabpawg kev ua

       dlejnum huv nruabnrog los txawv tebchaws (organismes

       nationaux, internationaux ou étrangers).

6)        nrhav kev txhim khu cov pawg ntseeg kuas luj hlub hab vaammeej.

B)  Rooj tsaavxwm ntawm HKMF yuav tsum muaj 9 leej lug dlha dlejnum :

1)  Tug thawj tsaavxwm.

2)  Tug Lwm tsaavxwm.

3)  Tug Teev ntawv.

4)  Tug paab teev ntawv.

5)  Tug canyaj.

6)  Tug paab ca nyaj.

7)  3 tug paab tuavxaam (assesseurs).